Këtë sezon turistik, bregdeti i Durrësit do ketë më pak hapësira publike krahasuar me vitet e kaluara.
Sipas burimeve të Bashkisë së Durrësit, është parë e arsyeshme që një vijë bregdetare prej rreth 42 kilometrash (nga Shkëmbi i Kavajës deri te Kepi i Rodonit), të ketë më pak plazhe publike.
Avdyl Koka, drejtori i Tatimeve në Bashkinë e Durrësit, shpjegon vendimin e marrë, teksa argumenton se hapësirat publike nuk mirëmbahen, prandaj është parë e udhës për t’ia kaluar në menaxhim privatit.
“Për shkak se hapësirat publike nuk mirëmbahen, e kemi parë të udhës të shikojmë mundësinë për t’ia kaluar në menaxhim privatit. Hapësirat publike kthehen në vend mbetjesh dhe krijojnë situatë të pakëndshme përgjatë vijës bregdetare.
Sa i përket bregdetit të Durrësit, këtu i referohem vijës bregdetare nga Ura e Dajlanit deri tek Shkëmbi i Kavajës, do të lëmë në dispozicion të pushuesve vetëm tri ose katër parcela të vogla, ku qytetarët do të qëndrojnë pa paguar.
Ato do të jenë në sektorin Apollonia dhe në Hekurudha”, u shpreh Koka.
Ndërkohë, qytetarët do të kenë mundësi për të pushuar pa paguar edhe në bregdetin e Rrushkullit, shkruan Panorama.
“Kemi menduar që një pjesë të bregdetit të Rrushkullit, në veri të qytetit të Durrësit, ta lëmë hapësira publike. Besojë se do të jenë mjaftueshëm. Ne si bashki kemi menduar që vija bregdetare është më mirë të menaxhohet nga privati, pasi privati e pastron dhe e mirëmban. Në këto kushte, mendohet t’i kalohet nën menaxhim privatit vija bregdetare, me qëllim që të krijohen kushte dhe infrastrukturë bashkëkohore”, u shpreh Koka.
