Rudi Vata, ka dalë në skenë për të komentuar zgjedhjet në FSHF, duke qenë më i brendshëm pasi ka konkurruar dhe ka pësuar disfatë përballë Dukës në 2010-ën. Ish-kapiteni i kombëtares kuqezi tha se dueli është mjaft interesant dhe shtoi se si Duka ashtu edhe Fino dinë si fitohet në Shqipëri, ku sipas tij mungon transparanca dhe jo çdo garë është e rregullt. Megjithatë, Vata vlerësoi platformën e deputetit socialist, Bashkim Fino për drejtimin e ardhshëm të Presidencës së FSHF-së.
“Më duket një garë interesante, një garë njerëzish të cilët normalisht dinë si funksionon ambienti shqiptar, dihet si fitohet në Shqipëri, dinë si luhen prapaskenat, jo çdo gjë është e rregullt dhe transparente. Bashkimi me platformën e tij më duket si një njeri që flet me pasion, me zemër, duket sikur i ka të vërteta ato që thotë, çdo nënkupton se do i realizojë ato dhe futbolli shqiptar do rritet”, u shpreh Vata për Report Tv.
Vata shprehet me bindje se futbolli shqiptar ka nevojë për ndryshime rrënjësore, duke kujtuar edhe humbjen përballë Armand Dukës, duke lënë të kuptohet se ka ardhur momenti për largimin e Armand Dukës.
“Nuk mund të ketë një garë të rregullt, të pastër në një vend si Shqipëria. Përderisa Shqipëria si një vend ku është instaluar në 27 vjet moskandidimi i vlerave, por njerëzit janë mbështetur nga politika, njerëzit janë bërë të suksesshëm përmes politikës dhe jo përmes vlerave, pra do ketë brenda blerjet, shitjet, tradhtitë e sigurisht që do ketë edhe korrupsion, ekziston në të gjitha fushat, shëndetësi, gjyqësor, e s’kishte si të qëndronte jashtë futbollit.
Kampionati shqiptar dihet që është i korruptuar, nuk shoh futbollistë të lumtur, nuk shoh tifozë në stadiume. Futbolli shqiptar është bërë si ato këpucët e migjenit dhe ka nevojë për një ndryshim absolut.”
