Në një konferencë për shtyp, zëdhënësi i FSHF-së Gerti Çarçani, ka hedhur poshtë akuzat e ditëve të fundit lidhur me shoqatat fantazmë që mund të minojnë procesin zgjedhor për kreun e këtij institucioni. Por sërish kemi një rast të dyshimtë sa i përket zgjedhjeve të 2010-ës, pasi këto shoqata ‘fantazmë’ kanë pasur të drejtën e votës edhe pse janë regjistruar pranë noterit publik në vitin 2011 sipas asaj që thotë FSHF.
“Rezulton se vullneti i anëtarëve themelues të këtyre shoqatave është shprehur përpara noterit publik shumë kohë përpara se kjo të ishte objekt kontestimi, duke ekzistuar qysh nga viti 2011, statute, akte themelimi dhe evidenca të depozitimit pranë regjistrit përkatës të gjykatës. Vendimi i gjykatës ka më tepër efekt publicitar ose deklarativ dhe nuk e prek kurrsesi për mbarëvajtjen e aktivitetit të FSHF”, u shpreh Gerti Çarçani.
Një reagim komprometues ka ardhur nga kryetari i Shoqatës Rajonale Tiranë, Sulejman Mema, i cili është shprehur se nuk është në dijeni nëse ka qenë e regjistruar.
Ai përfaqësonte Shoqatën Rajonale të Tiranës edhe në zgjedhjet e vitit 2010. Mema është shprehur për “Vipsport” se nuk ka informacion mbi regjistrimin e kësaj shoqate, anëtar me të drejtë votë i të cilës ishte, megjithëse sipas tij një gjë e tillë duhet të ketë ndodhur, por vetëm sipas vijës logjike.
“Në vitin 2010 jam zgjedhur nga Shoqata amatore e futbollit në Tiranë, për të pasur këtë përfaqësim. Sa i përket çështjes së regjistrimit së kësaj shoqate, nuk kam asnjë informacion. Megjithatë, nëse unë jam gjendur aty përpara disa vitesh, atëherë logjikisht kjo shoqatë duhet të jetë e regjistruar në shtet. A do të jem përsëri delegat? Mund të gjendem sërish këtë vit në zgjedhjet e reja për kryetarin e ri të FSHF-së, por nuk kam asnjë informacion më tepër rreth regjistrimit”, është shprehur Mema.
Kjo deklaratë hedh poshtë komunikimin për shtyp që bëri FSHF ditën e shtunë, ku u shpreh se shoqatat figuronin të regjistruara para noterit publik në 2011, sepse sipas Memës shoqatat kanë pasur të drejtë vote edhe në zgjedhjet e 2010-ës. TIRANA TODAY
