Në sajë të operacionit të koduar “The Truck”, blutë e Vlorës kanë arrestuar një shtetas të shpallur në kërkim, pasi në muajin janar të një viti më parë, është kapur me një sasi të konsiderueshme lënde narkotike. Burimet zyrtare komunikojnë se është bërë i mundur arrestimi i shtetasit Albano Rakipi, 26-vjeç, banues në Vlorë.
“Më datë 06.09.2018, Seksioni për Hetimin e Trafiqeve dhe Narkotikëve, në bashkëpunim me Sektorin e Shërbimeve Policore të Specializuara pranë Drejtorisë Vendore të Policisë Vlorë, kanë bërë të mundur finalizimin e këtij operacioni, ku si rezultat është arritur kapja dhe ndalimi i shtetasit të shpallur në kërkim, si autorë i dyshuar në lidhje me ngjarjen e mëposhtme:
Më datë 29.01.2017, gjatë kontrollit të ushtruar në Pikën e Kalimit Kufitar Durrës, në mjetin Kamion-Trailer me targë AA 8220S/AD801, në pronësi të firmës së tij, u gjet dhe u sekuestrua një sasi prej 425 kilogramë e 650 gramë, lëndë e dyshuar si Cannabis Sativa.
Gjithashtu, Gjykata e Shkallës së Parë për Krimet e Rënda Tiranë, me vendimin Nr.79, datë 22.03.2018, i ka caktuar shtetasit Albano Rakipi, masën e sigurisë “Arrest me burg”, bën me dije policia.
Sa i takon këtij rasti, materialet proceduriale iu referuan Prokurorisë për veprën penale “Trafiku i Narkotikëve”, kryer në bashkëpunim, mbetur në tentativë.
