Sot është mbajtur masa në Gjykatën e Shkallës së Parë Durrës, për shtetasit Arben Ferizi dhe Egert Vargu. Masa “arrest me burg” pa afat u caktua për shtetasin Arben Ferizi dhe “arrest me burg me afat” 18 ditë për shtetasin Egert Vargu. Arben Ferizi dhe Egert Vargu i kanë qëndruar deklaratave te tyre të mëhershme ku Ferizi është shprehur se nuk ka lidhje me drogën.
“Kompania ka porositur mish pule dhe të gjithë veprimet i kryejnë online. Porositet online dhe nuk kanë nga ta dinë se çfarë ka në kontenier. Kompania ka vite që merret me prodhimin e salçiçeve dhe është e suksesshme. Nuk ka nevojë të implikohet në trafikimin e drogës”, tha Ferizi.
Sakaq Egert Vargu me detyrë agjent doganor, ka deklaruar se nuk ka asnjë lidhje me këtë ngjarje. Sipas tij, ai ka për detyrë të ndjekë procedurat e zhdoganimit dhe jo të kontrollojë kontenierët.
Egert Vargu, i arrestuar si agjent doganor i kompanisë “Apetit Group”, në konteinerin e se cilës u gjet 45.5 kg kokainë, është anëtar i Këshillit Bashkiak në Tiranë në njësinë numër 8 me Partinë Socialiste. Vargu ka hyrë si anëtar i Këshillit Bashkiak pasi opozita ka braktisur Këshillin, sepse ishte i 43-ti në listë.
Konteineri ka lëvizur tranzit në disa porte ndërkombëtare, nga Brazili në Marok, në Hamburg të Gjermanisë në portin e Pireut në Greqi për të mbërritur më 20 Maj në Portin e Durrësit. Kontejneri ka qëndruar për përpunim në terminal deri më 15 qershor ku u zbulua në skaner lënda narkotike e ndarë në 40 pako dhe kamufluar me stampime të personazheve të filmave vizatimorë ‘Goku’ dhe ‘Buda’.
