Gerti Dajçi do të jetë drejtori i ri administrativ i klubit të Tiranës. Drejtuesi i ri zbuloi projektin e ri gjatë një komunikimi me mediat ku falënderoi presidentin, Refik Halilin për mundësinë që më dha të jem pjesë e Tiranës.
“Unë u bëra pjesë e këtij projekti dhe dua ta ngremë klubin në atë nivel që ka qenë. Ideja e projektit është që të ketë një menaxhim të mirëfilltë të Tiranës dhe do mundohemi t’i sheshojmë këto probleme. Aktualisht po diskutojmë me presidentin se çfarë mund të bëjmë të ardhmen.”
Ai foli për objektivat ku më primari tha se është rikthimi në Superiore dhe rikthimi te Tirana e lavdishme me tituj.
“Duam ta bëjmë një shoqëri private dhe ta ngremë në nivelet më të larta. Pasioni për skuadrën më riktheu këtu. Si çun “Tirone” pashë një mundësi dhe u riktheva. Jam shumë i informuar për çfarë ka ndodhur deri më tani me Tiranën. Do të rregullojmë çdo lloj situate negative në klub,” tha drejtuesi i ri.
