Pas panikut të krijuar me rrëzimin e urës në Itali, Drejtori i ARRSH-së, Afrim Qendro, garanton se situata në vendin tonë është nën monitorim.
Ai qetëson popullatën se monitorimi i urave bëhet nga kompani të mirëmbajtjes, dhe se ka një kontroll periodik.
Qendro ka shtuar se monitorimi është i madh, ndaj në fokus do të jetë ndërhyrja për të gjitha veprat e artit që ka rrjeti rrugor shqiptar.
“Kemi 175 km rrugë në administrim, kemi 1200 vepra arti ura me gjatësi të vogla, ose të larta, të cilat mirëmbahen dhe monitorohen nga ARRSH. Monitorimi i urave dhe veprave të artit bëhet përmes kompanive të mirëmbajtjes, e ndarë në dy pjesë.
Kompanitë e mirëmbajtjes janë të ndara në tre rajone: veri, Tiranë dhe jug. Po ashtu kompanitë që punojnë në projektin e mirëmbajtjes të BB. Ka një kontroll periodik dy herë në vit për veprat e artit, dhe kemi një ndërhyrje të vazhdueshme për të gjitha veprat e artit që gjatë periudhës që mirëmbahen shfaqin probleme.
Kemi ndërhyrë në tre vitet e fundit në 25 ura, gjithashtu nga projekti TAP janë përmirësuar 30 ura, të gjitha karakteristikat teknike.
Kemi ndërhyrje dhe në disa ura të reja që po bëhen, ura e Drojës, Zemblakut dhe ura në Sulov. Jemi në mënyrë të vazhdueshme në monitorimin dhe ndërhyrjen për të gjitha veprat e artit që ka rrjeti rrugor shqiptar”, përfundoi ai.
