Vazhdon kalvari i vuajtjeve për futbollistin nga Bahreini, Hakeem Al-Araibi, i cili është arrestuar në vitin 2012 me akuzën se ka dëmtuar një stacion policie në vendin e tij gjatë kohës së pranverës arabe. Autoritetet tailandeze, ku dhe po mbahet aktualisht 25-vjeçari, kanë vendosur që Al-Araibi nuk mund lirohet, pasi duhet të plotësohen të gjithë dokumentacionet e nevojshme në lidhje me kërkesën për ekstradim nga ana e autoriteteve të Bahreinit.
Kështu, lojtari nuk do të mund të rikthehet në shtëpinë e tij në Australi, vend në të cilin prej 4 vitesh gëzonte statusin e refugjatit politik, përpara se të arrestohej nga interpoli nëntorin e vitit të kaluar në aeroportin e Bankokut, vend në të cilin kishte udhëtuar për muaj mjalti.
Për rastin në fjalë ka ndërhyrë edhe qeveria australiane, që po përpiqet maksimalisht për ta ndihmuar Al-Araibin. Ndërkohë futbollisti ka një alibi të fortë në duart e tij, ditën që është vënë në pranga ai ka qenë duke luajtur futboll e për më tepër ndeshja është transmetuar “live”.
Gjyqtari që e ka dënuar 25-vjeçarin është anëtar i familjes mbretërore të sheikut Salman bin Ebrahim Al Khalifa. Ndaj këtij të fundit Al-Araibi është shfaqur kritik. Ministrja e Jashtme e Australisë, Maris Pein, ka deklaruar se qeveria e saj i bën apel autoriteteve tailandeze të lirojë lojtarin.
Përpara gjykatës, Al-Araibi është shfaqur me këmbët zbathur dhe të lidhura me zinxhir, teksa ka bërtitur në sallë që të mos dërgohet në Bahrein. Për rastin në fjalë ka reaguar edhe mbrojtësi i Juventusit, Giorgio Chiellini, i cili përmes një statusi në Twitter ka kërkuar që 25-vjeçari të rikthehet sa më shpejt në Australi. Ndaj Al-Araibit ka nisur dhe një fushatë në rrjetet sociale me hashtagun “shpëtoni Hakimin”.
