Policia e Maqedonisë ka vënë në pranga ish-ministrin e Transportit dhe Lidhjeve, Mile Janakieski, dhe ish-sekretarin e përgjithshëm të qeverisë, Kirill Bozhinovski.
Mediat maqedonase raportojnë se zyrtarët janë prangosur mbrëmjen e djeshme, dhe janë vendosur në burgun e Shuto Orizares.
Sakaq, ish-kryeministri i Maqedonisë, Nikolla Gruevski gjendet në vilën e kryeministrit hungarez, Viktor Orban. Lajmi bëhet i ditur nga gazetarja e televizionit 1TV, e cila po qëndron në Budapest.
Viktor Orban është mbështetës dhe aleat i Nikolla Gruevskit dhe VMRO-DPMNE. Ai kishte shprehur hapur mbështetjen ndaj partisë opozitare maqedonase, gjatë periudhës që ishte në pushtet. Por edhe tani në opozitë, kur vetë Orban mbërriti në Shkup në zgjedhjet e fundit lokale për të shprehur mbështetjen për VMRO-DPMNE-në.