Dosja “Hajdari” është sjellë në fokus nga ish-kreu i Shërbimit Informativ Shtetëror, Fatos Klosi, ku gjatë një interviste për “Shqiptarja.com”, ka thënë se Izet Haxhia ka të drejtën e tij që të rihapë çështjen. Po kështu ai ka shtuar se Haxhia nuk duhet që të ndalet, pasi ai duhet të vazhdojë të luftojë me të gjitha mjetet që ka në dorë, për atë të drejtë që i takon dhe për hapjen e çështjes për pozicionin e tij.
“Problemi është që të gjithë duan që të mos ngatërrohen me një çështje që e quajnë të mbyllur formalisht. Ndërkohë që unë mendoj se Izet Haxhia e ka të drejtën e tij, duke qenë se nuk ka qenë i pranishëm në procesin gjyqësor ku është dënuar.
Ai ka të drejtën e tij të rihapë çështjen e tij, të rishikojë pozicionin e tij lidhur me ngjarjen, në mënyrë që ai dënim i rëndë që ka marrë, mbase mund të zbutet. Por thash që duhet të ndiqen procedurat, por mesa duket kurrkush në këtë situatë, qoftë kur ka një reformë në gjyqësor, kur gjërat nuk janë fort të qarta, sepse reforma vetë ka nxjerrë shumë njerëz me probleme, kështu që në përgjithësi njerëzit në gjyqësor e kanë mendjen tek problemet dhe hallet e tyre, dhe jo t’i futet prapë çështjes në fjalë.
Mbase ata e mendojnë të zorshme dhe të bezdisur. Kështu që kjo është arsyeja. Nuk besoj se është presion politik, sepse nuk ka kushte për një gjë të tillë. Ata që mund të bënin presion politik, sepse nuk janë të interesuar që të hapet procesi janë në opozitë.
Thjesht është një çështje që njerëzit e gjyqësorit nuk kanë qejf ta rihapin e të ngatërrohen. Në këto kushte mbetet vetëm të pritet. Haxhia duhet të vazhdojë të luftojë me të gjitha mjetet që ka në dorë, për atë të drejtë që i takon dhe për hapjen e çështjes për pozicionin e tij.
Izet Haxhia duhet të ngulë këmbë. Problemi për t’u hapur është një problem procedurash, por se çfarë do të vendoset, pastaj është në varësi të argumenteve dhe provave që servir Haxhia, me qëllim që ta nxjerrin të pafajshëm. Tani me shtatorin dhe me rikthimin e njerëzve në punë, mbase do të ketë rast të kërkojë me ngulm dhe të rihapet. Pastaj se çfarë vendimi do të merret, varet nga ato se çfarë do të thuhen, nga argumentet e provat”, ka deklaruar ai.
