Ministri i Bujqësisë Niko Peleshi ka pranuar alarmin e ngritur nga Panariti, për qumështin me aflatoksinë, një substancë kancerogjene e fuqisë shumë të lartë.
Me anë të një postimi në Facebook, Peleshi bën me dije se duke marrë shkas nga raporti i AFI, u ka kërkuar institucioneve (laboratorit të referencës të ISUV dhe AKU) që të verifikojnë situatën e qumështit.
Po ashtu, Peleshi njoftoi se ministria po merr masat e nevojshme, teksa shkruan se ndërhyrja do të jetë radikale.
Alarmi për praninë e aflatoksinës në qumësht u dha sot nga ish-ministri i Bujqësisë, Edmond Panariti, i cili para pak muajsh kur mbante postin e Peleshit, siguronte për cilësi evropiane të qumështit dhe nënprodukteve të tij.
Reagimi i Peleshit:
Sistemi i sigurisë ushqimore në vend nuk ka qënë dhe nuk është perfekt. Pikërisht sepse bëhet fjalë për siguri ushqimore ndërhyrja duhet të jetë radikale. Ashtu sic u bë dhe po vazhdon të bëhet me ciklin e mishit, sikurse e kemi lajmëruar edhe më përpara do të ndërhyjmë në mënyrë po aq radikale edhe në ciklin e grumbullimit dhe përpunimit të qumështit.
Duke marë shkas edhe nga raporti i AFI, i kemi kërkuar institucioneve tona, laboratorit të referencës të ISUV dhe AKU që të verifikojnë situatën e qumështit dhe të ndërtojnë mbi këtë bazë planin për garantimin e standarteve dhe sigurisë ushqimore për produktet me origjinë shtazore dhe jo vetëm.
