Tekstet shkollore për klasat nga e para në të katërt, u shpërndanë falas në fillim të vitit, për tu mbledhur në fund të vitit shkollor. Por shumë pikëpyetje u ngritën nga mësuesit, e po kështu edhe prindërit, nëse këto libra mund të dorëzoheshin nëse shkruaje mbi to.
Pra, plotësimi me ngjyra i bën këto libra të papërdorshëm. Por një reagim është përcjellë nga Ministria e Arsimit, e cila citon se do të jenë komisionet ato që do të vendosin në fund.
Në një reagim për “Tevizionin Klan”, Ministria e Arsimit thotë se ka konstatuar këtë problematikë, dhe se në fund të vitit mësimor do të bëjë seleksionimin e teksteve.
“Ministria e Arsimit, Sportit dhe Rinisë, nuk ka synim që të trysnojë nxënësit, apo të penalizojë prindërit nëse libri plotësohet. Pasi kjo nismë pilot është në zbatim në vitin e parë të sajë.
Në fund të vitit shkollor, komisionet do të vendosin çfarë është e vlefshme nga tekstet për t’u ruajtur për vitin pasardhës do të ruhen. Kush prej teksteve është i papërdorshëm, nuk do të paguhet”.
Kërkesa e librit për ngjyrosje dhe kërkesa e qeverisë për tu përdorur vetëm lapsi i plumbit, vuri në dilemë mësuesit e klasave të para dhe prindërit e nxënësve.
