Drejtoresha e Autoritetit Rrugor Shqiptar, Sonila Qato, dha një ditë më parë dorëheqjen nga posti që mbante prej 8 muajsh. Këtë lajm e bëri të ditur vetë Qato, e cila në një postim në rrjetin social Facebook, shpjegoi arsyet që e çoi në këtë vendim.
Ajo u shpreh se e dha dorëheqjen pasi pak ditë më parë, u akuzua nga një kompani lidhur me një procedurë të cilën e gjykon plotësisht të drejtë dhe ligjore, duke iu referuar padisë që bëri në gjykatë “Gjoka Konstruksion”.
Por kush do të zërë këtë post të rëndësishëm në qeverinë Rama?
Burime për “Dosja.al” bëjnë me dije se ish- drejtoresha e Tatimeve Vasilika Vjero, është një prej kandidaturave kryesore për të drejtuar Autoritetin Rrugor Shqiptar, duke pasuar në detyrë drejtuesen e dorëhequr, Sonila Qato.
Gjithsesi, mbetet për t’u parë nëse kjo kandidaturë do të zyrtarizohet edhe me vendim të Këshillit të Ministrave.
Vjero më herët ka mbajtur postin e Drejtoreshës së Tatimeve dhe ka qenë edhe drejtuese e Qendrës Kombëtare të Biznesit.
