Ditën e djeshme presidenti Meta priti në Presidencë kryeministrin Edi Rama, i cili i dorëzoi dorëheqjen e Visho Ajazit nga kreu i SHISH.
Menjëherë pas kësaj, doli emri i kreut të ri të SHISH, Helidon Bendos.
Dorëheqja e Ajazit për Metën ka qenë e papritur, teksa thotë se vetëm para një jave kishte komunikuar me kreun e SHISH, duke i garantuar atij mbështetjen, ndërsa Ajazi e kishte falënderuar.
Por, a e ka dekretuar Meta emërimin e drejtorit të ri të SHISH?
“Dorëheqja e Ajazit, për mua ishte e papritur. Në natyrën time si gjithmonë në krye të institucioneve kam respektuar parimin e bashkë fqinjësisë. Dhe në rastin konkret, që bëhet fjalë për një institucion të një rëndësie të veçantë. Kam qenë i bindur që vazhdimësia gjithmonë është pozitive. Një javë më parë e kam garantuar zotin Ajazi që ai do të kishte mbështetjen time të plotë për të vazhduar të detyrën e tij në luftën kundër krimit të organizuar. Ai ka falënderuar për besimin dhe kjo ka qenë thjesht për të konfirmuar dhe vazhdimësinë. Bëra një garanci dhe mbështetjen, pasi e ka pasur. Nuk mbaj dot njeri pa dëshirë në funksione. Dekreti për emrin e ri? Nuk ka ngut dhe do ta shqyrtoj me qetësi”, ka thënë Meta në një intervistë për gazetarin Çim Peka.
