Ish-ministrja e Jashtme e Greqisë, Dora Bakojani ka kërkuar interpelancë me ministrin Kotzias në lidhje me diskutimet mes Greqisë dhe Shqipërisë. Interpelanca në fjalë është kërkuar për marrëveshjen e detit në vitin 2009, marrëveshja që u firmos nga ministri i Jashtëm i Shqipërisë, Lulzim Basha dhe ajo që po negociohet aktualisht mes palëve.-shkruan Tirana Today.
Sipas saj, negociatat po zhvillohen në mënyrë të fshehtë për përcaktimin e kufirit detar mes vendeve.
“Sipas njoftimeve në shtypin grek dhe atë shqiptar, qeveria është në marrëveshje të fshehtë me Shqipërinë për të bërë ndryshimet për delimitimin e zonave detare, i cili është nënshkruar nga qeveritë e të dy vendeve në vitin 2009.”-thuhet në kërkesën drejtuar Kotziasit-shkruan Tirana Today.
Konkretisht Bakojani i është drejtuar ministrit Kotzias për rrezikshmërinë që fsheh një rishqyrtim i marrëveshjes detare të 2009, pasi qeveria greke duket se po përmbush sipas saj kërkesat e palës shqiptare. “Sipas publikimeve mediatike, Greqia po negocion fshehtazi me Shqipërinë për delimitimin detar duke anashkaluar marrëveshjen e 2009-es, por duhet të dinë se komuniteti ndërkombëtar shkencor kishte përcaktuar saktë dhe qartë kufirin detar, duke lejuar një hapje të madhe Shqipërisë në Korfuz, ndërsa zbatonim plotësisht kriteret e “vijës së mesme” siç parashikon e drejta ndërkombëtare.
Ndër të tjera theksohet se: “Një marrëveshje e re, e papërgjegjshme dhe sipërfaqësore do shkaktojë precedentë të rrezikshme për përcaktimin e ardhshëm të kufirit detar ne zona te tjera”- ka pyetur ish-ministrja e Jashtme që firmosi me Shqipërinë marrëveshjen detare të 2009-es.
Pyetjet të cilat duhet t’ju përgjigjet ministri në interpelancë
-Pse po procedon qeveria me procesin e rishikimit të Marrëveshjes së Zonës së Balancuar të Detit 2009, e cila u ra dakord dhe u nënshkrua nga Greqia dhe Shqipëria?
-Cilat pjesë të Marrëveshjes po planifikojnë të rishikojnë?
-A është e vërtetë se qeveria synon të ndryshojë pozicionin e vendosur grek në demarkacionin e zonave detare në bazë të “vijës së mesme”? TIRANA TODAY
