Deputetët e parlamentit ligjërisht dhe teorikisht përfaqësojnë të gjitha territoret e Republikës së Shqipërisë. Por sa i dobishëm dhe i suksesshëm mund te jetë një deputet që nuk jeton në zonën e tij elektorale? Duke ju referuar një raporti të “Institutit të Studimeve Politike” (ISP), të drejtuar nga studiuesi Afrim Krasniqi, shohim që dy të tretat e deputetëve janë banorë të përhershëm në Tiranë. Shumica e qytetareve për shkak të kodit zgjedhor për mbështetje të partisë që përkrahin janë të detyruar që të votojnë edhe deputetët që nuk jetojnë në zonat ku jetojnë, shkruan Tirana Today.
Legjislacioni mbi Kuvendin nuk ka kritere detyruese që lidhin deputetin me vendbanimin e tij, megjithatë vazhdimisht ka pasur shqetësime rreth tendencës se politika është përqendruar në Tiranë dhe qytetet periferike janë të papërfaqësuara sa duhet. ISP kreu për herë të parë në historinë e parlamentit pluralist një monitorim të gjendjes faktike të vendbanimit të deputetëve krahasuar me zonën e tyre zgjedhore.
Të dhënat monitoruese të ISP mbi vendbanimin e deputetëve (deklarim i detyruar i përcaktuar të ndodhë çdo muaj shtator nga rregullorja parlamentar) tregojnë se në mars 2017 rreth 66% e deputetëve (92 nga 140 deputetë) banojnë në Tiranë. Pjesa tjetër, rreth 27% janë banorë të qyteteve ngjitur me Tiranën (Durrës, Elbasan, Lezhë, Lushnje) dhe vetëm një pakicë e vogël deputetësh vijon të jetë banor në njësi administrative të periferisë prej të cilave janë zgjedhur. Një raport i tillë krijon problematika të përfaqësimit të zonave zgjedhore dhe lehtëson praktikën kritike të ndjekur nga partitë politike për lëvizje të deputetëve drejt qarqeve të tjera pothuajse në çdo proces zgjedhor.
RAPORTI, MONITORIMI I KUVENDIT JANAR-KORRIK 2017 by Tirana Today on Scribd
Rreth dy muaj përpara fushatës, partitë kryesore politike (PS, PD e LSI) caktuan koordinatorët e bashkive dhe qarqeve, duke bërë zhvendosje të dukshme nga zonat zgjedhore ku të njëjtët individë janë zgjedhur më 2013. Për shembull, tre drejtuesit e listës zgjedhore të qarkut Lezhë për secilën parti kryesore, tashmë janë caktuar drejtues elektoralë dhe kandidatë potencialë në qarqe të tjera. Elementë të njëjtë gjejmë me qarkun e Kukësit, me qarkun e Dibrës, të Beratit, të Durrësit, të Gjirokastrës, etj.
Disniveli midis numrit të deputetëve në zonë dhe atyre që janë zhvendosur nga zonat zgjedhore drejt qendrës, pasqyrohet edhe në problematikën që vetë deputetët ngrenë në diskutimet e tyre parlamentare. Më shumë se 92% e diskutimeve nuk lidhen me zonën zgjedhore, por me politikën qendrore. Për pasojë, zgjedhësit përmes medias dhe instrumenteve të tjera të komunikimit publik shprehin vazhdimisht shqetësimin në rritje për mungesën e një përfaqësimi direkt të problemeve të tyre në punimet parlamentare. TIRANA TODAY
