Disa anëtarë të Partisë Demokratike i kanë dërguar sot kreut të kësaj partie, Lulzim Bashës një dokument, ku paraqesin ndryshime në Statusin e Partisë.
Dokumenti është firmosur nga dy anëtarët e Këshillit Kombëtar të Partisë Demokratike, Edith Harxhi dhe Edvin Kulluri.
Sipas dokumentit të firmosur nga këta të fundit, anëtarët e këshillit shkruajnë se ndryshimet statuore synojnë ringritjen e partisë, demokratizimin dhe bashkimin e saj mbi baza statuore me qëllimin e mirë për të nisur rrugëtimin drejt fitores në zgjedhjet e ardhshme në vend.
Statuti fut disa risi, teksa projekt-statuti e ndan partinë sipas parimit të kontrollit dhe balancës së pushtetit me pushtetin legjislativ (Kuvendin Kombëtar dhe Këshillin Kombëtar), ekzekutivin e partisë (kryesinë) dhe me organet e pavarura: Gjykatën, Komisionin e anëtarësisë dhe zgjedhjeve, si dhe Bordin financiar.
Kështu, organizimi në këtë mënyrë parashikon një ulje të ndjeshme të numrit të anëtarëve të Këshillit Kombëtar, nga 260 në 120, si dhe të Kryesisë, numri i anëtarëve të së cilës propozohet të bëhet 25, nga 40 që janë.
Mendohet se më pak anëtarë, do t’i bëjnë më efikase këto organe, ndërsa Gjykata e partisë është parashikuar të jetë aty për t’i dhënë kujtdo mundësinë për të ankimuar vendimet e partisë.
