Kryedemokrati Lulzim Basha ka reaguar në lidhje më dokumentarin e publikuar mbrëmjen e djeshme nga televizioni italian Rai3, teksa fliste për kultivimin e kanabisit në Shqipëri dhe përdorimin e vendit tonë si transit për shtetet perëndimore.
Përmes një deklarate për mediat, Basha u shpreh se ky dokumentar është provë e qartë se krimi shqiptar ka ndërtuar celulën dhe organizatat shqiptare kontrollojnë trafikun. Ndër të tjera, shton se është i tronditur nga të dhënat e publikuara nga italianët.
“Jam i tronditur nga dëshmitë e publikuara në Rai3. Sasia e kanabisit këtë vit është 5 herë më e lartë se vitin e kaluar. Krimi shqiptar ka ndërtuar celula në gjithë Evropën dhe Amerikën Latine. Organizatat shqiptare kontrollojnë gjithë trafikun e heroinës. Organizatat shqiptare janë kthyer në lojtarë të mëdhenj të trafikut, që e marrin në Evropë dhe e fusin në Shqipëri.”
“Dëshmitë e antimafias janë se këtë vit kanabisi po kultivohet në 1 të 3 e territorit të Shqipërisë. Krimi shqiptar ka ndërtuar celulën dhe organizatat shqiptare kontrollojnë trafikun. Krimi shqiptar u zhvillua për shkak të lirisë absolute që i jepet krimit. Ka kapur nivelet e qeverisjes. Kriminelët e kërkuar në Evropë shëtisin në Shqipëri. Këto janë gjetjet e dokumentarit bombë të shtetit italian. Droga dhe krimi në Shqipëri kanë një përhapje aq të madhe sa rrezikohet e ardhmja e vendit”, tha Basha.
