Lëndimi i Agueros duket se ka prishur skemat e trajnerit të Argjentinës, Jorge Sampaoli. Besohej se Sergio Aguero kishte një vend të sigurt në listën e përpiluar nga tekniku për të udhëtuar drejt Rusisë, por dëmtimi duket se është më i vështirë nga çfarë u mendua. Doktori i skuadrës kombëtare të Argjentinës, Homero D’Agostino nuk ka të njëjtin mendim për kohët e rikuperimit të sulmuesit të Manchester City, që të martën iu nënshtrua një pastrimi në gjurin e majtë, pas 5 javësh shqetësime.
“Kur një futbollist kryen një artroskopi 60 ditë përpara finaleve të Kampionatit Botëror, sigurisht që është diçka shqetësuese–tha doktor D’Agostino në një intervistë për Radio 10–Sepse rikuperimi pas një ndërhyrje të tillë kërkon 5 javë kohë. Kur dëmtimet janë të vjetra nuk mund të kryhen kaq shpejt rikuperimet”.
“Unë mendoj se nuk do të jetë në 100% të formës sepse anatomia është anatomi dhe dëmtimi është ai që kemi aktualisht. Do të provojmë, por nuk mendoj se do të arrijmë në kondicionin më të mirë”, përfundoi mjeku argjentinas. Një skenar ky që argjentinasit nuk e urojnë, por kjo është një mundësi shumë e mirë për Paulo Dybala dhe Mauro Icardi, që duket se janë të përjashtuar për momentin nga lista e futbollistëve që do të udhëtojnë në Rusi.
