Marjo Sinani, i arrestuar nga policia si autor i djegies së zyrës së noterit Aleko Anagnosti, ka zbuluar para hetuesve emrin e personit që porositi dhe e pagoi për punën që do bënte. Mësohet se ai është shprehur se është paguar për t’i djegur zyrën noterit. Ende nuk dihet se emrin e kujt ka rrëfyer Sinani para grupit hetimor, por 41-vjeçari ka shtuar se ka siguruar edhe prova për përfshirjen e tij në këtë krim. Marjo Sinani u arrestua mëngjesin e 7 qershorit, dhe në cilësinë e provës materiale atij i janë sekuestruar veshmbathje dhe sasi benzine që dyshohet se janë përdorur gjatë kësaj ngjarje. Sinani u arrestua pasi u pikas nga kamerat e sigurisë së noterisë teksa thyente derën dhe digjte dokumentet që ndodheshin në zyrë.
Djegia e zyrës noteriale erdhi 5 ditë pas arrestimit të Anagnostit, i cili është në “arrest me burg” për 45 ditë derisa Prokuroria të çojë prova të tjera në Gjykatë për tjetërsimin e pronave në Sarandë. Pasi dokumentet u dogjën, Prokuroria mori vendimin që ta vinte në sekuestro zyrën e Anagnostit, ku policia u urdhërua që të ekzekutojë vendimin.
