Në ditën e 25-të të protestës së banorëve të Astirit, këta të fundit paralajmërojnë forma nga më të ndryshmet për përshkallëzimin e saj. Madje, ata paralajmërojnë edhe akte ekstreme, si vetëflijimi në rast të prishjes së banesave të tyre, duke mos i dëmshpërblyer ata 100% me çmimin e tregut.
Lindita Protoduari është një nga këta banorë, e cila tha se edhe pse nuk ka armë, do të blejë 50 litra benzinë dhe do t’i vërë zjarrin vetes ditën kur fadromat do t’i drejtohen shtëpisë së saj. Këtë deklaratë, gruaja e cila mbeti e lënduar nga protesta para parlamentit, e bëri në studion e News 24.
Gruaja e cila ka denoncuar dy herë publikisht dhunën që sipas saj policia i ka shkaktuar në dy protesta ka edhe djalin të arrestuar Dorianin. Lindita thotë se nuk e ka takuar dot të birin që është transferuar në burgun e Fushë Krujës, ndaj të cilit gjykata vendosi masën arrest me burg për 30 ditë deri sa të dalë në gjyq.
Nëna e Dorjanit hedh poshtë akuzat e prokurorisë dhe gjykatës me argumentin se protesta nuk ka organizatorë pasi të gjithë banorët janë njësoj pjesëmarrës dhe të prekur nga projekt i unazës. Po kështu ajo sfidon si gjykatën dhe kryeministrin që t’i tregojnë një foto të vetme ku djali i saj ka një kapsollë në dorë apo hedh një të tillë në protestë.
