Vrasja e Azem Hajdarit vijon të mbetet ende mister. Ndërkohë akuzat dhe kundër akuzat janë shtuar ditëve e fundit për aktorët dhe porositësit e vrasjes.
Vendimi i Gjykatës së lartë në Turqi për ekstradimin e Izet Haxhisë ka nxitur debate të shumta në media. Ekstradimi i tij pritet të ndihmojë në grumbullimin e fakteve të reja , që mund të çojnë në ekzaminimin e plotë të ngjarjes.
Vetë Haxhia ka treguar se do të bashkëpunojë me drejtësinë shqiptare dhe do t’i shërbejë vetëm të vërtetës. I akuzuari dhe i dënuari për vrasjen e Azem Hadarit, Ismet Haxhia tregon në një interviste dhënë për “Panorama” se ish-kryeministrit Sali Berisha i interesonte eleminimi i Hajdarit.
Duke dhëne versionin e tij te ngjarjeve te asaj kohe, ai thekson se “qëllimi i Sali Berishës ishte shumëplanësh: të hiqte qafe Azem Hajdarin, sepse Berisha i mori partinë kur ishte Azemi themeluesi i saj”. Ismet Haxhia tregon se “Azem Hajdari ka thënë në Amerikë se do t’i fus plumbin në gojë Sali Berishës.
Berishës ia kanë çuar këtë mesazh të Azemit dhe ai nuk të fal, kur merr kërcënime të tilla”. Sipas tij, “duke e ditur se çfarë prite i ishte ngritur nga Haklajt, Berisha hiqte qafe Azemin, arrestonte dhe Haklajt si autorë të vrasjes së Azemit, duke akuzuar dhe pushtetin e kohës dhe ngrinte popullin si i viktimizuar për të marrë pushtetin. Është shumë diabolik”.
Ai thote me tej se “pistoleta me silenciator është administruar si provë në ngjarje, por nuk është përmendur asnjëherë. Sepse prokurorët, para se të shkonin në sallën e gjyqit, shkonin më parë në zyrën e Berishës.
Këshilltari i një ministri, erdhi më takoi dhe më tha: Ismet, ruajeni Izetin, mos të qarkullojë as në Tiranë dhe as në Shkodër, sepse është vendosur ta likuidojnë. Në tavolinën ku është vendosur likuidimi i vëllait tim, Izetit, i Haklajve dhe i Nehat Kullës, ka qenë Berisha me Genc Pollon, Majko me Ilir Metën dhe Petro Koçi, i cili në atë kohë ka qenë ministër i Brendshëm.
Petro Koçi dha dorëheqjen më pas, sepse e kishte mik Sherif Bashën, dhëndrin e Haklajve dhe nuk donte të bëhej pjesë e asaj vendimmarrjeje. Ka thënë që ne jemi shtet dhe duhet të luftojmë me ligjin e jo me vrasje. Më pas, e mori në dorë Spartak Poçi, i cili doli me deklarata duke thënë se kemi eliminuar 40 banda”.
