Historia e dhimbshme e Auretës u trajtua sot në emisionin “Me Zemër të Hapur”, në News 24, si një nga historitë e shumta të grave dhe vajzave te të cilat familja dhe fati ka vendosur gjithçka. E martuan me mblesëri, u bë nëna e një djali, por pas shumë peripecive dhe vuajtjeve të kaluara në familjen e bashkëshortit, mësoi se ai kishte probleme shëndetësore.
Djali i vogël u sëmur rëndë disa herë, për shkak të papërgjegjshmërisë së treguar nga ana e të atit të gjyshit. Si gjithmonë ishte Ilirjani, vëllai i Auretës, i cili i përgjigjej çdo kërkese për ndihmë duke e marrë nipin e duke e çuar në spital. Sipas Ilirjanit, pavarësisht dëshirës që nipi të rritej me baba, kjo dukej e pamundur, ndaj dhe vendosën që e motra të ndahej dhe djalin e vogël ta rrisnin vetë.
Nipi ka përfituar që nga lindja statusin e jetimit, dhe merrte nga shteti një pension të vogël të cilin ja kanë hequr. Ilirjani dhe Aureta e shohin këtë si një padrejtësi të madhe, dhe bëjnë apel që vogëlushi të marrë atë që me ligj i takon.
“U fejova me mblesëri, mbeta shtatzani pas 7 muajsh dhe shkova të jetoj në shtëpinë e tij. Isha 5 muaj shtatzënë, doli djalë. Doktori i tha do bëjmë analizë AND-je, ai thoshte nuk është fëmija im. Unë kam rënë dakord të bëj analizën e ADN, ai pastaj nuk hodhi firmën. Ai pinte shumë, besoj se akuzat i ka bërë nga pija. Ika nga ajo shtëpi, djalin e linda tek prindërit e mi”, tregon ajo.
Por dy vite pas ndarjes, Aureta thotë se u bashkua me ish-bashkëshortin pas lutjeve të tij.
“Aty nisën sërish vuajtjet. Bashkëshorti jetonte në kushte të vështira, dhe djali u sëmur disa herë. Madje me ka ndihmuar vëllai për të blerë ilaçe, se po të ishte për të, djali do vdiste”.
Vëllai i saj, Ilirjani tregoi në studio: “Shkova e mora nipin tim me forcë. Ai nuk donte të më linte. E mora nipin në krahë dhe e çova në spital pasi ishte në gjendje të rëndë, dhe i ati e mbante në shtëpi”.
Ilirjani thotë që pas atij momenti, nuk e la më nipin në shtëpinë e të atit.
Aureta nuk e regjistroi kurrë atësinë e djalit, dhe që prej lindjes ai përfitoi një pension, por tani që gruaja është rimartuar, pensioni thonë se nuk i takon më. Pikërisht për të rifituar pensionin e djalit, që Aureta thotë se i takon, pasi nga babai biologjik nuk ka përfitur kurrë asgjë, ajo kërkoi sot në studio ndihmën e ekspertëve. /BalkanWeb
