Djali i ish-kryeministrit Berisha ka komentuar vrasjen që tronditi Shkodrën, ku një person mbeti i vrarë pas një breshërie plumbash në kokë, teksa pinte kafe. Në një postim në Facebook, Shkëlzen Berisha shkruan me ironi se tani e kupton urdhrin e zv/ministrit të ri të Brendshëm, për ta pirë kafen në zyrë.
“Pas breshërive të plumbave në Shkodër, kuptova urdhërin e zv/min pse kafja duhet pirë në zyrë, dhe jo në pazar”, shkruan ai.
Kujtojmë se pak ditë më parë, Sandër Lleshi nxorri një urdhër të brendshëm, që ndalon rreptësisht gjatë ditëve të punës frekuentimin e kafeneve, restoranteve, njësive tregtare e çfarëdo mjedisi publik jashtë vendndodhjes, për arsye pune nga punonjësit e Ministrisë së Brendshme (përveçse për raste festash apo fatkeqësisht familjare dhe vetëm me lejen e eprorit). Mësohet se të njëjtën gjë i ka kërkuar Drejtorit të Përgjithshëm të Policisë së Shtetit, për uniformat blu.
