Kryedemokrati Lulzim Basha u është bashkuar banorëve të Astirit në ditën e 27-të të protestës së tyre. Teksa foli për korrupsionin që sipas tij e karakterizon këtë projekt, kreu i PD-së tha se zgjidhja e vetme është anulimi i tij:
“Deri më sot siç e keni bërë dhe ju të ditur tre fakte kanë dalë në dritë, korrupsion në prokurim, korrupsion në hartimin e projektit dhe korrupsion me mënyrën si është vepruar me pronën e qytetarëve, banorët. Kemi të bëjmë menjë aferë të madhe korruptive. Ditë pas dite si mediat dhe opozita kanë bërë të ditura këtë. Këtu po vidhen mijëra euro.
Janë paratë e qytetarëve që po vidhen. Ne jemi dhe do të jemi në krah të qytetarëve. Zgjidhja është anulimi i këtij projekti dhe dërgimi para drejtësisë i atyre që kanë shkelur ligjin”.
Më tej, Basha tha se qytetarët do të kenë mbështetjen e demokratëve deri në momentin e fundit që ky problem të marrë një zgjidhje të drejtë për ta.
“Nuk do t’i lëmë vetëm qytetarët. Bashkia e Tiranës nga një anë është kthyer në lavatriçe të pastrimit të parave të pista me leje ndërtimi dhe nga tjetër me shembull kampion i korrupsionit e me taksa të larta”.
