Kuvajti, Arabia Saudite, Jordania, Emiratet e Bashkuara Arabe dhe Izraeli iu bashkuan listës së vendeve, që u bëjnë thirrje qytetarëve të tyre të largohen nga Ukraina.
Sipas agjencisë shtetërore të lajmeve KUNA, Ministria e Punëve të Jashtme të Kuvajtit u bëri thirrje shtetasve kuvajtianë të pranishëm aktualisht në Ukrainë, që të largohen menjëherë për “hir të sigurisë së tyre”. Vendi gjithashtu i kërkoi Kuvajtit të vonojë çdo plan udhëtimi në Ukrainë.
Ambasada e Arabisë Saudite në Ukrainë, u bëri thirrje shtetasve të saj që të kontaktojnë menjëherë Ambasadën, për të lehtësuar evakuimin e tyre, sipas një postimi në llogarinë e saj zyrtare.
Ministria e Jashtme e Jordanisë lëshoi gjithashtu një deklaratë të shtunën, duke u kërkuar jordanezëve të mos udhëtojnë në Ukrainë. Në deklaratë thuhet se shtetasit jordanezë në Ukrainë, duhet të përgatiten për evakuim.
Në një postim në Twitter të shtunën, Ambasada e Emirateve të Bashkuara Arabe në Ukrainë tha: “Ambasada e Shtetit në Kiev u bën thirrje qytetarëve të vendit, që të shtyjnë udhëtimin në Ukrainë”. Ai u bëri thirrje gjithashtu shtetasve në Ukrainë që të kontaktojnë Ambasadën.
Ministria e Jashtme e Izraelit shkroi të shtunën në Twitter, duke u bërë thirrje gjithashtu qytetarëve të saj të largohen. Në një deklaratë nga ministria thuhej: “Si rezultat i përkeqësimit të situatës në lidhje me Ukrainën, Ministria e Jashtme rekomandon qytetarët izraelitë në Ukrainë të rishikojnë qëndrimin e tyre në vend, dhe në çdo rast të shmangin afrimin e pikave kryesore të tensioneve. Ministria e Jashtme rekomandon qytetarët izraelitë që planifikojnë të udhëtojnë në Ukrainë, që të konsiderojnë shmangien e një gjëje të tillë në këtë kohë… Ministria e Jashtme ka vendosur të evakuojë nga vendi anëtarët e familjeve të diplomatëve dhe punonjësit izraelitë në Ambasadë”.
Burimi i lajmit: CNN. Pershtatur nga Tirana Today
