Nikos Kotzias, ish-ministri grek i larguar nga qeveria e Tsipras javë më parë, ka lëshuar një deklaratë “bombë”. Në një prononcim për gazetarët, ai ka thënë se diplomatët grekë janë të përfshirë në trafik organesh. Po kështu Kotzias tha se nuk ka qëndruar në heshtje, dhe se 93 raste janë çuar në Prokurori.
“Nuk pajtohem se nuk kemi bërë asgjë. 93 raste kam çuar në Prokurori, ndërsa disa diplomatë kanë shkuar në burg, se miratonin viza për fëmijë të pashoqëruar. E dini ç’do të thotë të miratosh viza për fëmijë të pashoqëruar?
Të bësh trafik organesh. Dhe vetëm për faktin që kam shpëtuar disa shpirtra, do të flej i qetë kur jeta ime të mbarojë”, tha ish-ministri grek. Kjo deklaratë ka tronditur jo vetëm politikën, por mbarë opinionin publik. Ajo që mbetet mister ka të bëjë me zbardhjen e emrave të diplomatëve, të cilët janë të përfshirë në këtë krim.
