Diplomatët e karrierës, Dashnor Dervishi dhe Ilir Boçka janë nderuar sot me gradën “ambasador” nga presidenti Ilir Meta, për kontributin e tyre.
Dervishi dhe Boçka janë diplomatët e parë që e marrin zyrtarisht këtë gradë në periudhën post-regjimit.
Emri i Ilir Boçkës, i cili aktualisht është ambasador në Beograd, u dorëzua në presidencë nga Ministria e Jashtme në 2016-ën, por ish-presidenti Nishani vendosi të miratonte vetëm emrin e Dashnor Dervishit, për të përfituar këtë gradë.
Sipas ligjit për Shërbimin e Jashtëm, diplomatët e karrierës e përfitojnë gradën “Ambasador” pasi të kenë fituar njëra pas tjetrës të gjitha gradat diplomatike, dhe të kenë qenë në detyrën e kreut të misionit diplomatik të paktën dy funksione, por jo më pak se gjashtë vjet gjithsej.
Më pas, ministri i Punëve të Jashtme, bazuar në rekomandimin e Komisionit të Karrierës Diplomatike, i propozon Presidentit të Republikës dhënien e gradës personale “Ambasador” diplomatit të karrierës që përmbush kriteret e parashikuara në pikën 6 të ligjit.
