Globalizmi, marrëdhëniet kino-evropiane dhe samiti i radhës i G20-s janë temat kryesore që do të karakterizojnë vizitën shtetërore të presidentit kinez XiJinping në Gjermani. Udhëheqësi mbërriti të martën të Berlin dhe së pari takoi me kancelarn gjermane Angela Merkel. Xi u shpreh se Pekini mbështet një Bashkimin Europian: “të bashkuar, të qëndrueshëm, të begatë dhe të hapur.’’
Xi theksoi se gjendja e ndërlikuar ndërkombëtare ka nevojë për një marrëdhënie të qëndrueshme midis Kinës dhe BE-së, si dy fuqi botërore. Ai gjithashtu i bëri thirrje Gjermanisë që të luajë një rol drejtues dhe të ruajë zhvillimin e marrëdhënieve të nivelit të lartë midis Kinës dhe BE-së, ndërsa theksoi se shpreson që vizita e tij do të nxitë më tej partneritetin e gjithanshëm strategjik Kinë – Gjermani.
Presidenti Xi theksoi se Kina i mirëpret ndërmarrjet gjermane të marrin pjesë në ndërtimin e nismës ‘Brezi dhe Rruga’ dhe nënvizoi se përfitimet e arritura prej saj do të shpërndahen te vendet e përfshira në nismë.
Në lidhje me globalizimin, që sipas udhëheqësit kinez ndodhet në një udhëkryq historik, Xi i bëri thirrje Kinës dhe Gjermanisë, si dy vende që kanë përfituar nga tregtia dhe globalizimi që të përpiqen për ndërtimin e një sistemi më të qëndrueshëm dhe më gjithëpërfshirës.
Për kancelaren Angela Merkel, marrëdhëniet midis Gjermanisë dhe Kinës ndodhen në një fazë të mirë zhvillimi dhe e quajti frytdhënës bashkëpunim dypalësh pragmatik. Merkel gjithashtu çmoi rolin e Kinës në çështjet ndërkombëtare dhe mbështetjen e Pekinit për sistemin shumëpalësh.
Gjatë qëndrimit në Berlin, presidenti Xi do të angazhohet edhe në të ashtuquajturën ‘diplomacia e pandave.’ Ai do të marrë pjesë në ceremoninë e hapjes së Kopshtit të Pandave në Kopshtin Zoologjik të Berlinit dhe do të ndjekë një ndeshje futbolli midis ekipeve të të rinjve të Kinës dhe Gjermanisë.
Më pas, presidenti kinez do të marrë pjesë në samitin e G20-s në Hamburg. Ky samit do të mbledhë për herë të parë së bashku udhëheqësit botërorë, pas zgjedhjes së presidentit amerikan Donald Trump.
Kancelarja gjermane, Angela Merkel u tha mediave më herët këtë javë se priste një samit të vështirë të G20-s, për shkak të qëndrimeve proteksioniste të presidentit Trump. Samiti i vendeve kryesore të zhvilluara dhe në zhvillim që mbahet të premten dhe të shtunën në Hamburg, është shpallur si takimi ndërkombëtar më konfliktual i viteve të fundit.
Mosmarrëveshjet mes kancelares gjermane dhe presidentit amerikan janë të dukshme në lidhje me masat që duhen marrë për ndalimin e ngrohjes globale, tregtisë dhe shpenzimeve ushtarake.
Presidentët e Kinës dhe të ShBA-së do të përballen gjithashtu gjatë samitit të G20-s. Kjo ndodh pas disa incidenteve të ndodhura gjatë dy javëve të fundit midis dy vendeve.
Një destrojer amerikan iu afrua ishullit kinez Xisha në Detin e Kinës Jugore, një veprim që Ministria e Jashtme në Pekin e quajti “provokim serioz politik dhe ushtarak.” Të hënën të dy udhëheqësit biseduan në telefon në lidhje me zhvillimet e fundit në Gadishullin Korean dhe presidenti Xi theksoi se marrëdhëniet kino-amerikane janë ndikuar nga disa faktorë negativë.
Në këtë samit do të zhvillohet dhe takimi i parë zyrtar midis presidentit amerikan DonaldTrump dhe atij rus Vladimir Putin. Sipas Shtëpisë së Bardhë, takimi mes dy udhëheqësve do të zhvillohet të premten, por axhenda e saktë nuk është përcaktuar ende.
ShBA-ja dhe Rusia kanë dallime mbi në një numër çështjesh, si konflikti në Siri, kriza në Ukrainë dhe ndërhyrja e pretenduar ruse në zgjedhjet presidenciale amerikane. Moska nga ana e saj, ka bërë të ditur më parë se temat e diskutimeve mund të përfshijnë kontrollin e armëve dhe kthimin e pasurive diplomatike ruse të konfiskuara nga qeveria e ShBA-së dhjetorin e kaluar.
