Skena e ekzekutimit të biznesmenit Kastriot Reçi është filmuar nga kamerat e sigurisë. Tashmë hetuesit kanë arritur të zbardhin dinamikën e këtij krimi, i cili mendohet se është kryer me snajper.
Sipas burimeve nga hetimet paraprake, autorët kanë qenë dy persona, të cilët kishin udhëtuar drejt Rrëshenit me një automjet që në orët e para të mëngjesit. Pasagjeri është ulur nga makina, dhe nga bagazhi ka marrë një çantë të madhe dhe është ngjitur në një pallat. Në katin e 7 të një banese që ishte në pronësi të një personi mik me Armando Gjinin dhe ka vendosur snajperin. (Armando Gjini i njohur dhe si Tonin, u vra në gusht të 2019 pasi iu vendos tritol në makinën e tij.)
Mësohet se autori ka ruajtur momentin e duhur, raporton “Ora News”. Reçi së bashku me të vëllanë ka parkuar makinën, dhe ka shkuar në drejtim të lokalit. Më pas ka takuar një grua dhe një fëmijë, ndërsa i vëllai ka hyrë në lokal.
Në momentin kur është shkëputur nga gruaja me fëmijë, drejt tij është qëlluar me snajper. Thuhet se autori ka qenë i veshur sportiv dhe me një maskë si grua dhe është larguar në këmbë.
Ngjarja e rëndë ndodhi mesditën e 7 janarit. Ngjarja ka tronditur qytetarët, pasi ka ndodhur shumë pranë komisariatit të policisë në këtë qytet. Pistat ku po hetohet janë dy. E para, ajo e hakmarrjes për shkak të një vrasjeje të vitit 2016, ku u vra ish-drejtori i OSHEE-së, dhe e dyta, ajo e prishjes së pazareve të drogës.
“E pashë të shtrirë në rrugë”/ Vëllai i Kastriot Reçit tregon çfarë ndodhi
