Policia serbe ka vënë në pranga 4 persona që dyshohen si dhunues të dy shqiptarëve në Novi Sad. Mes tyre, në pranga kanë rënë V. Radiq, 22 vjeç dhe D. Radiq, 23 vjeç.
Lajmi është konfirmuar nga ministri i Brendshëm, Nebojsha Stefanoviç. Në një deklaratë për mediet, ministri serb tha se policia ka gjetur edhe rrobat e agresorëve, të cilat dyshohen se janë përdorur në momentin kur janë dhunuar shqiptarët.
Sipas tij, kjo do të ndihmojë hetimet në zbardhjen e ngjarjes së rëndë. Një nga të sulmuarit, Çlirim Maloku, 19 vjeç, ndodhet në gjendje kritike në spital.
Fjala e ministrit serb
Policia, pas një hetimi intensiv një disa shtigje, ka identifikuar të gjithë sulmuesit që rrahën dy të rinj dhe ka arrestuar katër persona të dyshuar për këtë vepër penale. Janë gjetur edhe rrobat që i kishin të veshura të dyshuarit të dielën në mëngjes me rastin e sulmit, që është e rëndësishme për vazhdim të hetimeve. Hetimi i deritanishëm, duke përfshirë edhe bisedat me të dyshuarit, por edhe me një prej viktimave, tregon se ky incident nuk është kryer në baza etnike. Policia do t’i shqyrtojë të gjitha akuzat në detaje dhe do të vijë deri tek e vërteta e plotë.
