Dhunimi i dy shqiptarëve në Serbi, ka shkaktuar reagime të shumta. Së fundmi, edhe kryeministri i Kosovës, Ramush Haradinaj ka folur rreth kësaj ngjarjeje. Në një reagim në Facebook, Haradinaj shkruan se “lëvizja e lirë në shtetin e Serbisë nuk është e garantuar”.
Po ashtu, kreu i qeverisë kosovare ka kërkuar zbardhjen e menjëhershme të ngjarjes nga shteti serb.
Haradinaj uron shërim të shpejtë për dy të rinjtë që u dhunuan në Novi Sad.
“I pashembullt akti i rrahjes brutale të dy të rinjve shqiptarë në Novi Sad. Sulmi mbi dy udhëtarë shqiptarë dëshmon se lëvizja e lirë në shtetin serb nuk është e garantuar dhe çdo akt dhune është larg vlerave europiane. Derisa Çlirim Maloku po lufton për jetë, nga lëndimet e marra, një shtet që negocion për anëtarësim në BE duhet të ndërmerr veprime të shpejta për ta zbardhur rastin. Dy të rinjve shqiptarë u uroj shërim sa më të shpejt, ndërsa sulmuesit të sillen para drejtësisë dhe të marrin ndëshkimin meritor”, ka shkruar Haradinaj në Facebook.
