Komisioni i Disiplinës ka marrë vendimin sa i përket dhunës së ushtruar ndaj arbitrit Alvi Paço, në Përmet nga stafi teknik dhe futbollistët e ekipit të Këlcyrës. Janë marrë masa ekstreme sa i përket dhunës së ushtruar ndaj zyrtarëve të ndeshjes, ku klubi i Këlcyrës është përjashtuar nga aktiviteti futbollistik, po ashtu janë dënuar edhe lojtarë e zyrtarë të klubit. Kjo është hera e parë që një ekip bëhet shembull sa i përket dhunë së ushtruar në stadiumet shqiptare, sidomos në Kategorinë e Parë dhe në të Dytën. Pasi ky është një rast që përsëritet dhe duket se do të jetë një shembull mjaft i mirë për ekipet e tjera, që të respektojnë ndeshjen si duhet dhe të mos cenojnë mbarëvajtjen e saj.
Vendimi ka qenë mjaft i ashpër ku KF Këlcyra do të përjashtohet nga gara për pjesën e mbetur të Kampionatit për sezonit futbollistik 2017/2018. Por nuk ka mbetur me kaq, pasi dënime mjaft të ashpra ka pasur edhe për zyrtarët e klubit të cilët dënohen me gjobë dhe përjashtim nga aktiviteti për vite dhe gjoba të majme.
Lojtarët e KF Këlcyrës Entilion Kamberi, Renis Spahiu dhe Kamber Kamberaj, që rezultuan si më agresivët në dhunën e ushtruar ndaj arbitrit janë përjashtuar përgjithmonë nga ushtrimi i aktiviteteve futbollistike. Katër lojtarë të tjerë janë pezulluar me dy vite nga ushtrimi i këtij aktiviteti.
Vendimi i plotë i Komisionit të Disiplinës:
1- KF “Këlcyra”, për dështim ne përmbushjen e përgjegjesive duke cënuar sigurinë e zyrtarëve të ndeshjes dhe shkelje të rënda të kryera nga stafi teknik dhe lojtarët e këtij ekipi duke shkaktuar ndërprerjen përfundimtare të lojes në ndeshjen kundër KF “Përmeti”, në bazë të nenit 12/1/f ,28, 49/5, 58/2, 65/2,65/4 dhe 66/3/c) të KDS, përjashtohet nga gara për pjesën e mbetur të Kampionatiti për sezonit futbollistik 2017/2018.
Ndeshja kundër KF “Përmeti”, deklarohet e humbur në tavolinë me rezultatin 3 me 0.
2- Zyrtari i KF “Këlcyra”, Robert Spahiu , për kërcënim,nxitje të akteve të dhunës ndaj zyrtarit të ndeshjes, në bazë të nenit 52/1 të KDS, dënohet me 12 (dymbëdhjetë) muaj pezullim nga aktiviteti dhe gjobë në masën 200.000 (dyqind mije) Lek. Në bazë të nenit 20 të KDS, zyrtarit i ndalohet qëndrimi në dhomat e zhveshjes, stolin e rezervave dhe territorin përreth fushës.
3- Lojtaret i KF “Këlcyra”, Entilion Kamberi, për dhunë ndaj zyrtarit të ndeshjes, në bazë të nenit 49/1/b të KDS, dënohet përgjithmon nga pjesëmarrja në çdo aktivitet futbollistik.
4- Lojtari i KF “Këlcyra”, Renis Spahiu, për dhunë ndaj zyrtarin të ndeshjes, në bazë të nenit 49/1/b të KDS, dënohet përgjiithmon nga pjesëmarrja në çdo aktivitet futbollistik.
5- Lojtari i KF “Këlcyra”, Kamber Kamberaj, për dhunë ndaj zyrtarin të ndeshjes, në bazë të nenit 49/1/b të KDS, dënohet përgjithmon nga pjesëmarrja në çdo aktivitet futbollistik.
6- Lojtari i KF “Këlcyra”, Fatjon Sakollari, për goditje ndaj zyrtarit të ndeshjes, në bazë të nenit 49/1.b të KDS, dënohet me 24 (njëzetekatër) muaj pezullim nga aktiviteti.
7- Lojtari i KF “Këlcyra”, Meleq Xhakollari, për goditje ndaj zyrtarit të ndeshjes, në bazë të nenit 49/1.b të KDS, dënohet me 24 (njëzetekatër) muaj pezullim nga aktiviteti.
8- Lojtari i KF “Këlcyra”, Fredi Kamberi për goditje ndaj zyrtarit të ndeshjes, në bazë të nenit 49/1.b të KDS, dënohet me 24 (njëzetekatër) muaj pezullim nga aktiviteti.
9- Lojtari i KF “Këlcyra”, Kristi Koshi, për goditje ndaj zyrtarit të ndeshjes, në bazë të nenit 49/1.b të KDS, dënohet me 24 (njëzetekatër) muaj pezullim nga aktiviteti.
