Në optikën e FBI-së lidhur me hetimet mbi ndikimin rus në zgjedhjet presidenciale në SHBA, është edhe dhëndri dhe njëherësh këshilltari i presidentit amerikan, bashkëshorti i Ivanka Trump, Jared Kushner.
Siç raporton kanali televiziv amerikan NBC, “Hetuesit e FBI-së mendojnë se Kushner ka informacione të rëndësishme përsa i përket hetimit rreth kësaj çështje”, por pa nënkuptuar që ai dyshohet se ka kryer ndonjë shkelje.
Hetimi ka indicie takimin e Jared Kushner, në cilësinë e ndërmjetësit kryesor të Donald Trump në çështjet e politikës së jashtme, me ambasadorin rus në SHBA, Sergei Kislyak, si dhe një bankier rus, në dhjetor të vitit të kaluar.
Trump i ka hedhur poshtë aludimet se ai, ose fushata e tij kishin kontakte jopërkatëse me zyrtarët e Rusisë, duke i cilësuar “një gjueti të pastër shtrigash”. Edhe Moska, nga ana tjetër, mohon të ketë ndikuar në zgjedhjet presidenciale amerikane.
Në janar, agjencitë e shërbimeve sekrete amerikane deklaruan se “hacker”-a të mbështetur nga Kremlini kishin hyrë në adresat e postës elektronike të disa drejtuesve të lartë demokratë duke publikuar informacione delikate të përfituara në këtë mënyrë, me qëllimin të ndihmohej fitorja e Trump.
