Presidenti i Ukrainës, Volodymyr Zelensky, ka kritikuar ashpër kryeministrin hungarez, Viktor Orban, duke i quajtur qëndrimet dhe politikat e tij kundër Ukrainës si një “gabim historik”.
Në një intervistë për median hungareze Valasz Online, Zelensky akuzoi Orbanin se po përdor Ukrainën për qëllime elektorale. “Ai nuk e kupton se kjo do të ketë pasoja shumë serioze dhe të rrezikshme. Duke mos na ndihmuar ne, ai po i bën një favor presidentit rus, Vladimir Putin,” tha Zelensky.
Për javë të tëra, qeveria e Orbanit ka zhvilluar një fushatë propagandistike kundër ndihmës për Ukrainën, duke vendosur pankarta në të gjithë Hungarinë me mesazhe që e lidhin mbështetjen ndaj Kievit me rrezikun e përfshirjes në luftë dhe dëmtimin e ekonomisë vendase. Në disa nga këto pankarta është përdorur edhe portreti i Zelenskyt.
“Si mund ta përdorë ai fytyrën time për zgjedhjet e tij? Unë nuk i kam dhënë leje për një gjë të tillë,” u shpreh presidenti ukrainas.
Zelensky përmendi gjithashtu një rast spiunazhi, ku Shërbimi ukrainas i Sigurisë arrestoi dy shtetas ukrainas me origjinë hungareze, të dyshuar për bashkëpunim me inteligjencën ushtarake të Hungarisë (KNBSZ). Ai tha se ka edhe prova të tjera, të cilat nuk janë bërë ende publike.
Në reagim, Hungaria arrestoi një person të dyshuar si spiun për Ukrainën, i cili sipas autoriteteve hungareze ishte i afërt me udhëheqësin opozitar, Peter Magyar.
Hungaria, vend anëtar i BE-së dhe NATO-s, pritet të mbajë zgjedhje parlamentare në fillim të vitit 2026, ndërsa Viktor Orban ndodhet përballë një presioni të rritur nga partia e re konservatore e Magyarit, Tisza, që po kryeson sondazhet.
“Ai [Orbani] po e përdor Ukrainën për qëllimet e tij elektorale. Ai nuk e kupton se kjo do të ketë pasoja shumë serioze dhe të rrezikshme. Duke mos na ndihmuar ne, ai po i bën një favor [presidentit rus, Vladimir] Putin. Prandaj unë them se Viktori është duke bërë një gabim serioz dhe historik”, tha Volodymyr Zelensky.
