Detaje/Vrasja me plumb në zemër fundosi bandën e shqiptarëve, shfrytëzonin vajza për prostitucion

Të tjera detaje janë publikuar nga mediat italiane, lidhur me aksionin e ndërmarrë nga karabinierët, të cilët kanë shkatërruar një bandë kriminale shqiptare. Ajo akuzohet për shfrytëzimin për prostitucion të vajzave nga Evropa Lindore, mes të cilave dhe një e mitur.
Prokuroria e Komos ka lëshuar urdhër-arreste për 21 shtetas shqiptarë e një shtetase rumune, ku disa prej tyre ende nuk janë ndaluar. Ndaj disa shqiptarëve është leshur masa e sigurisë arrest me burg, dhe ata janë shpallur në kërkim. Ndërsa dy nga shqiptarët e kësaj bande kontrollonin aktivitetin e tyre nga burgu i Monzës dhe burgu Opera i Milanos ku ndodheshin të dënuar për vepra penale të kryera më parë.
Të arrestuarit janë të gjithë banorë në provincën e Brianzas dhe Komos dhe kishin shtrirë aktivitetin e tyre kriminal në gjithë territorin mes Milanos dhe Komos.
Në një dalje për mediat, zyrtarë të policia italiane kane zbardhur disa nga detajet e këtij operacioni.
Hetimet kanë nisur pas vrasjes me një plumb në zemër të shqiptarit Ilir Berisha më 15 shtatorin e vitit 2017 e arrestimin në kufirin italian me Francën të autorit të këtij krimi, shqiptarit Emiliano Biqmeti 34 vjeç.
Hetimet e mëtejshme zbuluan se vrasja ka lidhje me shfrytëzimin e vajzave për prostitucion. 25 vajzat që shfrytëzoheshin për prostitucion nga grupi i shkatërruar nga policia rrëmbeheshin në vendet e tyre të origjinës si në Shqipëri, Moldavi, Rumani, Hungari. Janë të moshës 20-25 vjeçe por mes tyre ka dhe një vajzë minorene.
Sipas hetuesve italianë, skema kriminale e këtij grupi nuk ishte piramidale, por horizontale. Çdo anëtar i tij zotëronte një zonë të caktuar dhe një vajzë duke nxjerrë fitime që shkonin nga 6-12 mijë euro në muaj.
Ky grup kriminal fitonte duke dhënë me qira dhe vendet e punës në rrugë të vajzave që punonin si prostituta. Fitimi për secilin prej anëtarëve të bandës mund të arrinte dhe në 900 euro në natë.
Gjatë hetimeve të operacionit të shkatërrimit të këtij grupi u sekuestruan dhe 38 kg marijuanë fshehur në një kamion në Brianza, një pistoletë e 25 mijë euro.