U desh më shumë se një vit që të zbardhej vdekja e një gruaje në Fier. Mjeku e spitalit të Fierit kreu një krim të rëndë kur fshehu shkaqet e vërteta të vdekjes së shtetases Vreke Velaj. Mjeku në atë kohë deklaroi se ishte vdekje natyrale, por sot rezulton se ishte një vrasje.
Pas një pune hetimore disa mujore nga Policia e Fierit në bashkëpunim me Prokurorinë e Krimeve të Rënda Tiranë, është arritur të sigurohen prova dhe të merret masa e ndalimit ndaj autorit të dyshuar të vdekjes së Vreke Velajt, bashkëshortit të saj, Namik Velaj, 75 vjeç, banues në Patos.
Ditën e sotme është vënë në pranga Namik Velaj, pas një hetimi të gjatë nga policia dhe prokuroria. Ndërsa mjeku i Qendrës Shëndetësore Patos, Ilir Tanku, i cili e ka trajtuar si natyrale vdekjen e gruas, i është hequr e drejta e ushtrimit të profesionit, si edhe ka filluar procedimi penal për veprën penale “Shpërdorim i detyrës” dhe është dhënë masa e sigurisë “Detyrim paraqitje” në Policinë Gjyqësore.
Vëllezërit e viktimës në muajin tetor 2017 kanë ngritur pretendime se motra e tyre është vrarë dhe autori i dyshuar mund të ishte bashkëshorti i saj.
Ata kanë thënë përpara grupit hetimor se në trupin e viktimës kanë konstatuar shenja dhune si dhe kanë përjashtuar pistën e vdekjes natyrale. Me marrjen në shqyrtim të kësaj padie dhe rishqyrtimit të provave, grupi hetimor ka dalë në konkluzionin se Vreke Velaj është vrarë nga bashkëshorti i saj Namik Velaj, 75 vjeç.
Njoftimi i policisë:
Zbardhet vrasja e një shtetaseje nga bashkëshorti i saj në Janar të vitit 2017. Policia ndalon autorin e dyshuar të ngjarjes. Procedohet penalisht edhe mjeku i Urgjencës së Spitalit Rajonal Fier për veprën penale “Shpërdorim detyre”.
Specialistët për Hetimin e Krimeve të Rënda në Drejtorinë Vendore të Policisë Fier, kanë rifilluar hetimet për një ngjarje të ndodhur në Janar të 2017 ku ka humbur jetën shtetasja V.V, vdekja e së cilës është trajtuar si vdekje natyrale.
Pas një pune hetimore disa mujore nga Policia e Fierit në bashkëpunim me Prokurorinë e Krimeve të Rënda Tiranë, është arritur të sigurohen prova dhe të meret masa e ndalimit ndaj autorit të dyshuar të vdekjes së shtetases V.V, bashkëshortit të saj, shtetasit:
-Namik Velaj, 75 vjeç, banues në Patos.
Gjykata e Shkallës së Parë për Krimet e Rënda Tiranë, me vendimin e datës 23.02.2018, ka vendosur masën e sigurisë “Arrest në Burg” për veprën penale “Vrasje për shkak të marrëdhënieve familjare” parashikuar nga Neni 79/c i Kodit Penal.
Gjithashtu është marrë masa e heqjes së të drejtës së ushtrimit të profesionit për mjekun e Urgjencës së Spitalit Rajonal Fier, shtetasin I.T si edhe ka filluar procedimi penal për veprën penale “Shpërdorim i detyrës” dhe është dhënë masa e sigurisë “Detyrim paraqitje” në Policinë Gjyqësore. Vijojnë hetimet për dokumentimin e plotë të ngjarjes.
