Pritet që Klement Balili të dalë nesër para Gjykatës së Krimeve të Rënda, pasi do të verifikohen veprimet hetimore të prokurorit dhe kushtet e ndalimit. Liljana Muça është gjyqtarja që do të shqyrtojë çështjen e tij.
Gjykata pritet që të vendosë masën “burg pa afat” për “Eskobarin e Ballkanit”, i cili shumë shpejt pritet që të përballet me akuzat, pasi dosja është dërguar në Gjykatën e Krimeve të Rënda për gjykim.
Prokuroria e Krimeve të Rënda ka ngritur katër akuza për Balilin. Ai do përballet në gjykatë me akuzën e “Trafikimit të lëndëve narkotike kryer në bashkëpunim në formën e Grupit të strukturuar kriminal”, “Pjesëmarrje në Grupin e Strukturuar Kriminal”, “Refuzim për deklarimin e pasurisë” pranë ILDKPI, dhe “Pastrim i Produkteve të Veprës penale”.
Kujtojmë këtu faktin se Klement Balili prej ditës së djeshme ndodhet në Drejtorinë e Policisë së Tiranës, ku është në pritje për të dalë para Gjykatës së Krimeve të Rënda.
Burimet bëjnë me dije se Balili po qëndron i vetëm në një qeli “VIP” te paraburgimi i policisë së kryeqytetit.
Në këto qeli kanë qëndruar më parë edhe ish-deputetë të arrestuar për abuzime e korrupsion.
Balili është takuar me avokatin, dhe me një prej familjarëve të tij.
