Kufoma e gjetur në ujërat e Castro në Lecce mund t’i përkasë avokatit të zhdukur shqiptar, Besnik Muços.
Megjithatë, do të jetë testi i ADN-së ai që e zbulojë këtë, gjë që u kërkua nga Prokurori i Maceratës.
Trupi i pajetë u gjet para pak ditësh në brigjet italiane, ndërsa viktima është dëmtuar ndoshta për shkak të përplasjes së vazhdueshme me shkëmbinjtë në det.
Jo vetëm kaq, por mediet italiane raportojnë se kufoma nuk ka as kokë dhe se identifikimi i tij është mjaft i vështirë.
“Trupi është shumë i gjymtuar dhe duket se nuk ka kokë. Ai gjithashtu nuk ka rroba. Prandaj është e pamundur të identifikohet nga autoritetet në Lecce, të cilët e vendosën trupin në frigoriferin e morgut të qytetit”, raportojnë mediat italiane.
Trupi i pajetë u gjet më 5 nëntor në zonën e Punta Correnti jashtë portit të marinës së Castro.
Për shkak të kushteve të këqija ka qenë e pamundur nxjerrja e tij, por një ditë më pas është dashur ndërhyrja e ekipit të Rojes Bregdetare.
Dyshohet se trupi i pajetë mund t’i përkasë avokatit shqiptar Besnik Muço, i cili u zhduk që më datën 2 nëntor të këtij viti, pasi u nis me tragetin e linjës Durrës-Bari, për të shkuar te familja e tij, në Macerata, ku jetonte prej 15 vitesh.
Bashkëshortja e tij ka mbërritur në Shqipëri pak ditë më parë për të ndjekur nga afër hetimet për gjetjen e bashkëshortit të saj, ndërsa dy fëmijët i kanë lënë me gjyshërit në Itali.
