Personi që vrau mbrëmë në New York 8 njerëz dhe plagosi 11 të tjerë është identifikuar si Sayfullo Saipov, i cili jeton në New Jersey pasi emigroi nga Uzbekistani 7 vjet më parë.
Saipov sulmoi me kamion çiklistët dhe këmbësorët në mbrëmjen e së martës në New York, pranë Qendrës Tregtare Botërore, duke lënë 8 persona të vdekur para se të përplasej me një autobus shkollor.
Pas sulmit shoferi doli nga kamioni me një armë false në dorë duke bërtitur “Allahu Akbar”, ndërsa u qëllua nga policia dhe më pas u arrestua.
Sulmuesi la një shënim në kamion, ku pretendonte se sulmin e kreu në emër të Shtetit Islamik të Irakut dhe Levantit.
Mediet lokale raportojnë se 29-vjeçari jetonte në Paterson të New Jerseyt me familjen e tij, me gruan dhe dy fëmijët e vegjël.
Një mik i autorit të sulmit tha se Saipov ishte shumë miqësor.
“Ai është djalë shumë i mirë, është shumë miqësor. Ai është si vëllai im i vogël, më sheh mua si vëllain e madh. Edhe fëmijët e mi e duan atë, ai luante gjatë gjithë kohës me ta”, ka thënë Kobiljon Matkarov, 37-vjeçari që u njoh me Saipov 5 vite më parë në Florida.
Sipas të dhënave, Saipov ishte një shofer kamioni, i cili krijoi disa biznese pasi u transferua në SHBA.
Donald Trump e ka quajtur sulmuesin “një person të sëmurë dhe të çrregullt”.
“Ne nuk duhet të lejojmë ISIS të rikthehet apo të hyjë në vendin tonë. Mjaft!”, tha presidenti i SHBA-ve.
