Dalin detaje të reja lidhur me zjarrin e frikshëm që ra në tregun industrial në Laç në orët e para të mëngjesit. Sipas tregtarëve, zjarri ka qenë i qëllimshëm, ndërsa në vendngjarje është gjetur edhe një shishe benzinë.
Dëmet materiale janë të mëdha, ndërsa një tregtare ka treguar se autori është një person që ka pasur konflikt me tokën në treg. Ai kishte kërcënuar prej një jave se do i vinte flakën tregut, ndërsa tregtarja akuzon shtetin që nuk ka marrë asnjë masë as pas kërcënimeve.
“Këtu fajin e ka vetëm shteti. Ka një javë që na paralajmëron se do të na vendosë zjarrin. Na kanë kërcënuar këta që janë në konflikt me tokën këtu. Erdhi policia dhe nuk e shoqëroi burrin. Janë 70 tregtarë që kanë humbur mallin dhe djersën këtu. Kanë jetuar me këto lekë. Kemi hyrë borxh me mund dhe djersë. Kush do na përgjigjet ne. Kam punuar me 3 mujor në Greqi dhe erdha e hodha lekët këtu. 3-4 mln lekë i kam humbur unë. Ka të tjerë që kanë humbur 10 mln lekë”, ka thënë ajo.
