Të tjera detaje kanë dalë në lidhje me atentatin ndaj dy vëllezërve Baho në fshatin Murras të Elbasanit, ku mbeti i vrarë Klevi Baho, 22 vjeç, i cili sapo ishte liruar nga burgu në Itali.
Objektivi i atentatit mësohet të ketë qenë Aleksandër Baho, vëllai i viktimës. Dy pistat kryesore ku po hetohet është ajo e larjes së hesapeve dhe prishja e pazareve të trafikut të drogës.
Raportohet se në momentin e atentatit, viktima, Klevi Baho, i është kundërpërgjigjur me armë atentatorëve që deri më tani dyshohet se janë dy persona. Policia në vendin ku është gjetur trupi i 22 vjeçarit, poshtë një ure, ka sekuestruar edhe një pistoletë tip ‘GLOCK’, e cila paraprakisht dyshohet se ka pasur 15 fishkë. Ndërkohë, Aleksandër Baho nuk është personazh i panjohur për policinë shqiptare dhe atë italiane, ku në shkurt të 2016 ai ka rënë pre e një atentati të mirë organizuar në Itali, e për pasojë ka mbetur me pasoja të rënda shëndetësore.
Policia ka nisur hetimet për të zbardhur aktivitetin e dy vëllezërve në Shqipëri, por edhe jashtë saj.
