Sot ishte parashikuar të kryhej procesi i verifikimit nëse funksionon apo jo byzylykët elektronikë, të cilët përdoreshin për të dënuarit në arrest shtëpie.
Ministria e Drejtësisë kishte parashikuar që të kryhej sot ky proces verifikimi. Por, testimi nuk u bë i mundur. Ndërsa ka qenë vetë ministria ajo që ka bërë sqarimin përkatës për mosrealizimin e testit, për të cilin ka ngritur një grup pune.
Sqarimi publik i Ministrisë së Drejtësisë
Në vijim të procesit të ditës së djeshme për marrjen nën ruajtje të byzylykëve elektronikë pranë Ministrisë së Drejtësisë, sot sipas procesverbaleve të nënshkruara midis kompanisë dhe grupit të punës në Ministrinë e Drejtësisë, do të duhej të kryhej procesi i verifikimit të funksionaliteteve të pajisjeve, me qëllim përfundimin e procesit të marrjes së tyre në dorëzim.
Fillimisht u ra dakord që procesi sot të fillonte në orën 9.00. Përfaqësuesit e kompanisë nuk u paraqitën. Për këtë arsye, grupi i punës rinjoftoi kompaninë që procesi do fillonte në orën 16.00. Edhe në orarin e ri përfaqësuesit e kompanisë nuk u paraqitën. Grupi i punës ka vendosur që të bëjë testin e njërës prej pajisjeve për të parë funksionalitetin. Në varësi të këtij testimi, do të njoftohen edhe masat ligjore që do të marrë Ministria e Drejtësisë mbi këtë çështje.
