Presidenti republikan, Donald Trump akuzoi sot demokratët si përgjegjës për dështimin e reformës në sistemin shëndetësor, premtuar që prej shtatë vitesh nga kampi i tij.
“Të gjithë demokratët na kanë braktisur, madje edhe disa republikanë. Pjesa më e madhe e republikanëve kanë qenë besnikë, të mrekullueshëm dhe kanë punuar fort. Ne do të rikthehemi”, shkruan Donald Trump në rrjetin social “Twitter”, pasi u detyrua një ditë më parë të pranonte se projektreforma kishte dështuar nga braktisja e senatorëve republikanë.
Ky dështim shënon një humbje të madhe për republikanët që kontrollojnë në të njëjtën kohë Dhomën e Përfaqësuesve, Senatin dhe Shtëpinë e Bardhë.
Ndarë mes ultra-konservatorëve dhe të moderuarve, republikanët kishin shtyrë tashmë disa herë shqyrtimin e reformës Obamacare, ligji simbolik i demokratit Barack Obama për mbulimin shëndetësor.
Dje në mbrëmje, dy senatorë dhanë goditjen duke njoftuar se do të votonin kundër një versioni të ri të hartuar nga krerët e maxhorancës.
