Një ngjarje e rëndë u shënua një ditë më parë, ku trupi i Enisa Dodës u gjet nga peshkatarët në një largësi 700-800 m nga bregu. Në lidhje me këtë ngjarje, policia ka arrestuar 25-vjeçarin Indrit Bajraktari. Ky i fundit nuk e ka ndihmuar adoleshenten, duke e lënë të mbytej.
Por ndryshe nga çfarë është raportuar deri më tani nga ana e policisë, qarkullon edhe një tjetër version i kësaj ngjarje.
“News 24” raporton se një version ndryshe të ngjarjes në Velipojë ka treguar nipi i familjes Doda në Bathore. Ai thotë se Indrit Bajraktari drejtonte skafin, por në bord kishte dhe vajza të tjera. Sipas tij, një manovër e gabuar në një kthesë, ka bërë që vajzat të rrëzohen.
17-vjeçarja Enisa Doda nuk dinte të notonte, dhe nuk ishte e pajisur me jelek shpëtimi. Ndërsa vajzat e tjera dinin not, ndaj dhe shpëtuan.
Ja çfarë njoftonte më herët policia:
Velipojë, Shkodër
Vihet në pranga një 25-vjeçar për ngjarjen e ndodhur në Velipojë ku humbi jetën si pasojë e mbytjes në det një 17-vjeçare.
Strukturat hetimore të Drejtorisë Vendore të Policisë Shkodër në bashkëpunim me Shërbimet e Policisë Velipojë, menjëherë pas ngjarjes së ndodhur ku humbi jetën si pasojë e mbytjes në det një 17-vjeçare, organizuan punë nën drejtimin e Prokurorisë së Rrethit Gjyqësor Shodër për zbardhjen e rrethanave të ngjarjes.
Në përfundim të veprimeve të para hetimore u bë arrestimi në flagrancë i shtetasit:
– I. B., 25 vjeç, banues në fshatin Kullaj, Njesia Administrative Postrribë Shkodër.
Nga tërësia e veprimeve hetimore rezultoi se më datën 19.08.2020, rreth orës 14:00, në vendin e quajtur Vilu, plazh Velipojë Shkodër, ky shtetas ka hyrë në det me motorr uji të marrë me qera së bashku me shtetasen E. D., 17 vjeçe, banuese në Bathore.
Rreth orës 16:30, ky shtetas ka dalë në breg pa motorrin e ujit duke lënë të mbytur në ujë shtetasen E. D., e cila kishte ardhur për pushime së bashku me familjen e saj.
Në cilësinë e provës materiale u sekuestrua çelësi i motorrit.
Materialet i kaluan Prokurorisë pranë Gjykatës së Shkallë së Parë Shkodër për veprime të mëtejshme për veprat penale “Shkaktimi i vetëvrasjes”, “Moskallëzimi i krimit” dhe “Veprime që pengojnë zbulimin e së vërtetës”.
