Mbrëmjen e ditës së djeshme janë zhvilluar dy gjysmëfinalet e ‘Kupës së Federatës’ në volej për femra. Në gjysmëfinalen e parë ka qenë përballja Partizani-Teuta, e cila është fituar nga të kuqtë me lehtësi në rezultatin e pastër 3-0. Interesante ka qënë përballja e dytë që ka përcjellë mjaft emocion ku Tirana arrin të përmbysë rezultatin nga 0-2 në 3-2, ndaj kampionëve në fuqi Barleti Volej. Kështu në finale e kupës do të kemi një debi kryeqytetas.
Në formacionin e të Partizanit të drejtuar nga trajneri Tarja kanë spikatur Nezaj dhe Blloku të cilat kanë arritur të shënojnë nga 12 pikë secila. Ndërsa tek Teuta bie në sy Romina Matoshi me 16 pikë duke u klasifikuar si më e mira e ndeshjes. Plot 30 pikë ka arritur të fitojë ekipi i Partizanit nga gabimet e durrsakeve, kundrejt 18 gabimeve të tyre. Në përballjen tjetër ekipi kampion bën një shfaqje që le për të dëshiruar përballë Tiranës e cila gjeti forcën të përmbysë gjithçka edhe pse me dy sete në disavantazh. Pikëshënuesja më e mirë e gjysmëfinales së dytë ishte Braho nga ekipi i Barletit, por që i vlen si statistikë personale pasi ekipi i saj u s’kualifikua.
Finalja e Kupës së Federatës mes Partizanit e Tiranës është caktuar të luhet të dielën në orën 17:00.
Këto sfida kanë pasur edhe një tribunë vip të pasur, pasi në sallën olimpike ‘Feti Borova’ ishin të pranishëm Drejtori i Agjencisë së Parqeve dhe Rekreacionit në Bashkinë Tiranë, Blendi Goxhe, apo edhe vëllai i kryeministrit Rama, Olsi. Të cilët janë shoqëruar nga Erlind Pëllumbi president i Federatës Shqiptare të Volejbollit dhe trajneri i kombëtares së femrave, Altin Martiro. Ka pasur problem teknikë në sallën olimpike pasi nuk ka funksionuar tabela elektronike, pikët janë reklamuar në tabelën e vjetër me formate letre.
Ditën e sotme do të zhvillohen edhe gjysmëfinalet e kategorisë meshkuj ku Vllaznia do të ketë përballë Farka Volej, ndërsa ekipi Studenti do të përballet me Partizanin.
