Deputetja e Lëvizjes Socialiste për Integrim, Nora Malaj ka deklaruar se kryeministri Rama e ka ftuar atë që t’i bashkohet PS-së, por ajo nuk e ka pranuar këtë propozim.
E ftuar në emisionin “Ditë e Re”, Malaj ka rrëfyer edhe një lidhje tjetër me kryeministrin Rama, të cilin tha se e ka shok fëmijërie, por ka qenë edhe një kundërshtare e flaktë e disa prej vendimeve të tij:
“Rama më ka propozuar të shkoj tek partia e tij, por unë nuk kam pranuar. Me Ramën kam edhe një lidhje. Unë dhe Edi jemi shokë fëmijërie dhe shokët e fëmijërisë nuk zgjidhen por i ke. Në këtë raport kam pasur një ndjesi mbështetëse por e kam respektuar në pozicionin e Kryeministrit, kemi punuar shumë bashkë, më ka dëgjuar edhe kur kam qenë e prerë, kemi pasur edhe përplasje dhe në disa çështje kam qenë kundërshtare e flaktë e tij”, ka thënë Malaj.
