Deputetja demokrate e njëherësh Kryetarja e Komisionit të Medias, Albana Vokshi, ka denoncuar dhunën ndaj gazetarit Julian Shota. Në shenjë këmbane alarmi, ajo sikundër dhe kolegët e saj kanë shprehur shqetësimin për sjelljen e policisë dhe Prokurorisë, ku sipas saj, nuk duhet të bëhen vegël e krimit.
Mjaft e revoltuar me këtë situatë ku gazetari kërcënohet me pistoletë në kokë, Vokshi nënvizon se mos reagimi i duhur, mbrojtja e kërcënuesve, jo vetëm sjell mbulimin e së vërtetës e shtrembërimin e realitetit, por lë terren që ngjarje të tilla të përsëriten.
Korrespodenti i “Report TV”, Julian Shota, u kërcënua me armë në kokë dhe nuk u lejua të raportonte mbi shpërthimin e ndodhur në një bar-kafe në Laç.
Kjo ngjarje pason pas breshërisë me plumba në mes të natës, në muret e shtëpisë së familjes së Klodiana Lalës, duke dëshmuar se liria e medias dhe jeta e gazetarëve në Shqiperi është çdo ditë e më shumë e kërcënuar.
