Pas një qëndrimi të shkurtër për mediat, ku tha se djali i tij nuk ka kryer dhunë, deputeti socialist Rrahman Rraja e ka parë të udhës për të dhënë disa argumenta më të forta, pas përballjes së fortë, e akuzave të njëpasnjëshme nga ana e opozitës. I përballur me një trysni të jashtëzakodshme, ai kërkon që të hetohet vendodhja e tij, ditën për të cilën akuzohet.
Mjaft i revoltuar, për atë që ai e cilëson si një keqkuptim të deklaratave që thotë, kërkon nga Prokuroria që të hetojë çështjen deri në fund. Ndër të tjera, deputeti nxjerr edhe një fakt të papublikuar më herët.
Ai thotë se familja e tyre dhe e vajzës kanë marrëdhënie të vjetra miqësore, të cilat janë të pandryshuara sot dhe gjithë jetën. Në fund, Rrahman Rraja kërkon që kjo çështje mos të komentohet më nga politika, por ti lihet në dorë drejtësisë, për ti dhënë verdiktin përfundimtar.
Pas akuzave nga ana e opozitës, sot policia ka marrë në mbrojtje shtetasen Xhisiela Maloku, e cila akuzon djalin e deputetit të PS, se është dhunuar prej tij.
Vajza nga Kruja ka bërë disa denoncime kundër Rexhep Rrajës, por më pas i ka tërhequr brenda ditës. Dy efektivë të Policisë së Shtetit, kanë marrë në mbrojtje vajzën në banesën e saj, në fshatin Nikël të Fushë-Krujës, aty ku ajo jeton me familjen e saj.
Djali i tij, Rexhep Rraja u arrestua dje me akuzën e “përndjekjes” së ish-të dashurës Xhisiela Maloku me të cilën është ndarë në korrik të 2018-ës.
Çështja e Xhisielës trazoi politikën, pasi denoncimi i saj u zbulua rreth tre muaj më pas, kur ish-oficeri i Fushë-Krujës, Emiljano Nuhu nga arratia, akuzoi publikisht se ishte kërcënuar me jetë për të liruar djalin e deputetit.
