Deputetë të Partisë Demokratike u janë bashkuar banorëve në Shkozë, të cilët po përballen me prishjen e banesave të tyre për shkak të rehabilitimit të lumit të Lanës.
Konkretisht, deputetët Albana Vokshi dhe Edi Paloka kanë mbërritur në Shkozë mëngjesin e sotëm për të mbështetur banorët.
Në një deklaratë për mediat, Paloka i kërkoi kryeministrit të mos sillej si armik me njerëzit, por të tregohej njerëzor.
“Këtu sikur jemi në ndonjë vend që është në mesin e një lufte. Lufta është mes kësaj qeveri dhe banorëve jo vetëm të Shkozës, por të gjitha atyre që e besuan Edi Ramën dhe i dhanë votën. Kështu është kur i beson Edi Ramës. Jemi këtu për të sensibilizuar opinionin dhe për t’i bërë thirrje Edi Ramës mos u sill si armik me qytetarët e tu, bëhu njerëzor!”, tha ndër të tjera Paloka.
Ndërkohë, ditën e djeshme, në Shkozë ishte Grida Duma e cila tha se PD do mbështesë këto familje, edhe në rrugë ligjore.
Sot, njëri prej banorëve, tha se deputetja e zonës, Elona Gjebrea, i vuri në gjumë banorët, duke i mashtruar se askush nuk do i nxirrte në rrugë.
